म्याग्दीको पुवा अमेरिका र युरोपका बजारमा

३ डिसेम्बर, ०७ । म्याग्दी जिल्लामा उत्पादन हुने अल्लो पुवाबाट तयार गरिएको धागो अमेरिका, जर्मनीलगायतका आठ देशमा निर्यात हुने गरेको समाचार प्राप्त भएको छ । म्याग्दी जिल्लाका लुलाङ, दाना, ओखरबोट, गुर्जा, मुदी, चिमखोला, कुइनेमङ्गलेलगायतका गाविसहरूका सामुदायिक वनमा पाईने अल्लो संकलन गरेर कृषकहरूले गत वर्ष रु. ३० लाख आम्दानी गर्न सफल भएको बताईन्छ ।जङ्गलबाट संकलन गरी ल्याएको अल्लो पुवालाई प्रशोधन गरेपछि प्रतिकेजी रु. ४० का दरले अल्लो संकलकहरूले अरू व्यपारीहरूलाई बेच्ने गरेका छन् ।व्यापारीहरूका अनुसार पुवालाई प्रशोधन गरी उत्पादन गरेको धागोले अमेरिका, जर्मनी, चीन, बङ्गलादेशलगायतका मुलुकहरूमा राम्रो बजार पाएको छ । ती मुलुकहरूबाट अत्यधिक माग बढेपछि अहिले म्याग्दीमा अल्लो संकलनका लागि अनुमति माग्न जिल्ला वन कार्यालयमा आउनेहरूको सङ्ख्या बढेको जिल्ला वन कार्यालय म्याग्दीले जनाएको छ । जिल्ला वन कार्यालय म्याग्दीका अनुसार व्यापारीले वन कार्यालयबाट न्यून परिमाणमा वन पैदावार उपभोग गर्ने अनुपतिपत्र लिए तापनि अनुपति पत्रको कैयौ गुणा बढी अल्लो पुवा सङ्कलन गरी लैजाने गरेका छन् । अहिलेको सिजनमा अल्लो पुवाको कारोबार गर्न १० जनाले अनुमति पाएका छन् । जिल्ला वन कार्यालय म्याग्दीका अनुसार जिल्लाको पाँच हजार ८८६ हेक्टर वन क्षेत्रबाट प्रतिवर्ष करिव ७४ हजार किलो अप्रशोधित अल्लो पुवा उत्पादन हुने गरेको छ ।
for more news click hear