चुनावको पक्षमा किरण, बादल र बिप्लव

धेरैको अनुमान बिपरित प्रचण्ड र बाबुराम संविधानसभा चुनावको बिपक्षमा तथा किरण, बादल र बिप्लव चुनावको पक्षमा रहेको खुलासा भएको छ ।
माओवादी अन्तर पार्टी बिबादमा अध्यक्ष प्रचण्ड र वरिष्ठ नेता डा. बाबुराम भट्टराई संविधानसभा चुनावको बिपक्षमा तथा मोहन बैद्य 'किरण', रामबहादुर थापा 'बादल', र नेत्रबिक्रम चन्द 'बिप्लव' को समूह चुनावको पक्षमा रहेको खुलासा भएको छ । यसअघि प्रचण्ड र बाबुरामको समूह माओवादीमा नरमपन्थी र संविधानसभा चुनावको पक्षमा रहेको तथा किरण, बादल र बिप्लवको समूह उग्र र चुनावको बिपक्षमा रहेको मानिएको थियो ।
हिमालखबर डट कमसँग कुरा गर्दै माओवादीको गैरसंस्थापन पक्षका प्रवक्ता मानिने बिप्लवले मुलुकलाई अनिर्णयमा लामो समय अलमल्याउन नहुने तथा छिटै निकास दिन संविधानसभा चुनाव हुनैपर्ने पक्षमा आफूहरु रहेको बताए । संविधानसभा चुनावले अहिलेको प्रक्रिया टुङ्गो लगाउने तथा 'जनयुद्ध' को अर्को चरण सुरु हुने हुनाले पनि आफूहरु चुनाव हुनै पर्ने पक्षमा रहेको उनले उल्लेख गरे । माओवादीले संविधानसभा चुनावको माग उठाएको तथा चुनाव नहुँदा पार्टी चुनाव विरोधीका रुपमा बदनाम हुने भएकाले चुनावको पक्षमा आफूहरु रहेको उनको भनाइ थियो । प्रचण्ड र बाबुराम चुनावको बिपक्षमा तथा अहिलेकै स्थितिलाई तन्काउने पक्षमा रहेको संकेत गरे पनि बिप्लवले स्पष्ट शब्दमा त्यो भन्न अस्विकार गरे ।
श्रोतका अनुसार, प्रचण्ड र बाबुराम संविधानसभा चुनावको पक्षमा नहुनु चुनावमा पार्टीको अवस्था कमजोर हुने उनीहरुको आंकलन प्रमुख कारण हो । जबकि, किरण, बादल र बिप्लवको समूह पार्टीको जनाधार कमजोर रहेको मान्ने पक्षमा छैन । त्यो समूहको बिश्लेषणमा चुनावमा नेपाली कांग्रेस र एमाले जति आफ्नो पार्टीको स्थान नआए पनि परिणाम लाजमर्दो हुनेछैन । यसैगरी, प्रचण्ड र बाबुराम आफ्नो पार्टीको स्थानीय नेतृत्व अन्य दलको जति प्रभावकारी नरहेको बिश्लेषणमा छ तथा त्यसले चुनावमा नकारात्मक प्रभाव पार्ने मान्छ भने अर्को पक्ष स्थानीय नेतृत्व नेपाली कांग्रेस र एमालेलाई टक्कर दिने हैसियतमा रहेको बिश्वास गर्छ । प्रचण्ड र बाबुरामलाई सम्झौतावादी मान्ने माओवादीको गैरसस्थापन पक्ष 'जनयुद्ध' लाई निरन्तरता दिन पनि चुनाव हुनै पर्ने तथा चुनावमा जस्तो स्थिति आए पनि आफ्ना माग लिएर आन्दोलन गर्न सजिलो हुने बिश्वासमा छ । यसबिपरित, प्रचण्ड र बाबुराम पक्ष अहिलेकै समिकरणमा धेरै उपलब्धी हाशिल गर्न सकिने तथा चुनावमा जानु पार्टीका लागि हानिकारक हुने बिश्लेषणमा रहेको श्रोत बताउछ ।
संविधानसभा चुनावबारे प्रचण्ड र बाबुराम बिपक्षमा तथा किरण, बादल र बिप्लवको समूह पक्षमा रहे पनि अन्य मामलामा भने गैरसंस्थापन पक्ष नै कट्टरपन्थी देखिन्छ । बिगत शान्ति सम्झौतामा पार्टी नेतृत्व धेरै लचकदार भएको गैरसंस्थापनको निश्कर्ष छ भने १२ बुँदे समझदारी गर्नुलाई त्यो पक्ष कमजोरी मान्छ । यसैगरी, भारतसँग पार्टी नेतृत्व झुकेको तर्क गर्दै राष्ट्रियताको आन्दोलन अघि बढाउनुपर्नेमा त्यो पक्ष छ । बालाजुमा भएको बिस्तारित बैठक अघि पार्टी केन्द्रीय कार्यलय शंखमुलमा भएको माओवादी केन्द्रीय समितिको बैठकमा किरण, बादल र बिप्लव समूह बहुमतमा पुगेकै कारण राष्ट्रियता र जनतन्त्रका लागि संघर्ष गर्ने नीति पारित गरेको थियो ।
राष्ट्रियताको मुद्धालाई नउठाएको तथा सम्झौताहरुमा धेरै लच्किएकै कारण साउनमा राजधानीको बालाजुमा भएको माओवादी बिस्तारित बैठकमा प्रचण्ड र बाबुरामको नेतृत्वले कार्यकर्ताको खप्की खानुपरेको थियो । बालाजु बैठकको निर्णयकै कारण माओवादी नेतृत्वले २२ माग सार्दै सरकार छाडने निर्णय गरेको थियो तथा आन्दोलन गर्ने घोषणा गरेको थियो ।