आज र भोलिभित्र सहमती बन्ने के साचो होला त प्रचण्ड को भविष्यवाणी ?

माओवादी अध्यक्ष प्रचण्डले विराटनगरमा पुगेर आज र भोलिभित्र सहमती बन्ने भविष्यवाणी गर्नुले सम्भावना बढेको हो। उहांले सात दलीय एकतामा जोड दिदै आ-आफनो अडान त्याग्न आग्रह गर्नुभयो । एमाले महासचिवले सहमती बनाउन माओवादी लचक हुनुपर्ने र सरकार संचालनमा सुधार गर्नुपर्ने बताउनुभएको छ ।
दलहरु आ-आफनो अडानबाट पछि हट्ने सम्भावना बढेको छ । कांग्रेस गणतन्त्र घोषणा गरी संसदबाट लागू गर्ने पक्षमा उभिएको छ भने माओवादी आफूले उठाउदै आएको गणतन्त्र घोषणा र पूर्ण समानुपातिक निर्वाचन प्रणालीको अडानबाट पछि हट्ने संकेत देखिएको छ ।
यता राजधानीमा दलहरु सहमती जुटाउने अभियानका सक्रिय भएकाले छिट्टै निकास निस्कने संकेत मिलेको छ । राजनीतिक असहमतीका लागि आज नेताहरुले सिंहदरबारमा छलफल गरे । आजको छलफलमा नेपाली कांग्रेसका तर्फबाट कार्यवाहक सुशील कोइराला, एमाले नेता भरतमोहन अधिकारी, माओवादी वरिष्ठ नेता डा.बाबुराम भट्टर्राईलगायत छ दलका नेताहरु गम्भीर छलफलमा व्यस्त छन् । आज र भोलिभित्र सहमती निकाल्ने अठोटका साथ छलफलमा सक्रिय नेताहरु सहमतीमा नआइसकेपनि नजिक पुगेका छन् ।
कांग्रेस कार्यवाहक सभापति सुशील कोइरालाले सहमतीको नजिक पुगेको बताउनुभयो । अन्यौल अन्त्यका लागि जस्तोसुकै त्याग गर्न तयार रहेको बताउदै भन्नुभयो,'गणतन्त्र स्थापनाको प्रक्रियामा जान कांग्रेस तयार छ तर पूर्ण समानुपातिक कुनै हालतमा मान्दैनौं ।' एमाले नेता इश्वर पोखरेलले सहमतीका लागि प्याकेजमा छलफल भएको बताउनुभयो । उहांले संविधानसभालाई केन्द्रबिन्दु बनाएर छलफल गरिएको सहमती निस्कने सम्भावना औल्याउनुभयो । माओवादी वरिष्ठ नेता डा.बाबुराम भट्टर्राईले गणतन्त्र घोषणा निश्चित भएको बताउनुभयो । उहांले छिटोभन्दा छिटो सहमती बन्ने संकेत मिलेको बताउनुभयो ।
माओवादीले सेना समायोजन, सरकार पुनः गठन, वेपत्ता परिवार र्सार्वजनिक गर्नुपर्ने, शिविर व्यवस्थापनलाई प्रभावकारी बनाउनुपर्नेलगायतका विषय पनि उठाएको स्रोतले बतायो ।
चौतर्फी गृहकार्य भएपनि सहमती निर्माण त्यति सजिलो भने छैन । सहमती बनाउनकै लागि दश दिन स्थगित संसद पुनः तीन दिन स्थगित गरिएको थियो । भोलि बस्ने बैठक अगावै सहमती बनाउन अधिकतम प्रयास जारी छ । १६ मंसिरमा संसद बैठक बस्नुअगावै सहमती निकाल्ने भनिएपनि राजनीतिक ठन्डीले जमेको हिउंको ढिक्का फुटाउन सजिलो भने छैन । दलहरुका लागि पछिल्लो चुनौती पार गर्नु फलामको च्यूरा चपाउनुसरह भएको छ । तथापि सहमतीको विकल्प नभएकाले आशा गर्ने प्रशस्त ठाउं छ ।