जाने भय भुटानी शरणार्थीहरु अमेरिका /

भुटानी शरणार्थीहरुलाई तेस्रो मुलुकमा पुनर्स्थापना गर्ने योजना अन्तर्गत अमेरिका लैजाने प्रकृयाको प्रारम्भिक काम मंगलबारदेखि शुरु भएको छ ।
तेस्रो मुलुक पुनर्स्थापना गर्ने कार्यको समर्थन र विरोधमा रहेका शरणार्थीहरुबीच नै पटक पटक झडप भैरहेपनि अमेरिकी अधिकारीहरुले अन्तर्वार्ताको काम शुरु गरेका छन्।
तेस्रो मुलुक पुनर्स्थापनाका पक्षमा रहेका भुटानी शरणार्थी स्थायी समाधान समन्वय समितिका हरि ढकालले मंगलबार बेलडांगी शिविरका तीन घरका सदस्यहरुसंग अन्तर्वार्ता लिइएको बताए।
झापा र मोरङमा रहेका एक लाख भन्दा बढी भुटानी शरणार्थीहरुमध्ये साठी हजारलाई अमेरिका लैजान काम शुरु भएपछि जान चाहने र नचाहने बीचको विवाद बढदै गएको छ।
यस अघि पनि सोही विषयमा विवाद बढ्दा दुई जना शरणार्थीको ज्यान गएको थियो।
माग
आफुलाई भुटान कम्युनिष्ट पार्टी माओवादी भनिने एउटा भूमिगत संगठनको केन्द्रीय सदस्य बताउने प्रकाशले क्याम्प कमिटिको सहमतिविना गरिएका कार्य मान्य नहुने बताए।
उनले सबैलाई चित्त बुझ्ने ढंगले पारदर्शी काम हुनुपर्ने माग पनि गरे।
बुधबारदेखि दैनिक सात, आठ परिवारको दरले अन्तिम अन्तर्वार्ता लिइने बताईएको छ।
नेपाल र भुटानबीच पन्ध्र चरण सम्मका मन्त्रीस्तरीय वार्ता उपलब्धिविहीन भएपछि भुटानी शरणार्थीहरुलाई मानवीयताका आधारमा अमेरिका लगायतका मुलुकले आफ्नो देशमा पुनर्स्थापना गर्ने प्रस्ताव गरेका थिए।
तर शरणार्थी नेताहरुचाहिं शिविरका धेरैजसो शरणार्थीहरु अझै स्वदेश फिर्ती कै अडानमा रहेको बताउंछन्।