अन्तरिम संसदको १० दिन पर सारिएको बैठक शुरु हुन तीन दिन मात्रै बाँकी रहँदा सातदलीय गठबन्धनका प्रमुख नेताहरुले आपसी भेटघाट र परामर्शलाई तीव्र पारेका छन्।
नेकपा माओवादीले अघि सारेका मागहरुकाबारेमा गठबन्धनभित्रै मतभेद कायमै रहँदा त्यस्ता परामर्शहरु शुरु गरिएका हुन्।
नेकपा एमालेका महासचिव माधबकुमार नेपालले सोमबार आफूले प्रधानमन्त्री गिरिजाप्रसाद कोइराला तथा माओवादी अध्यक्ष प्रचण्डसँग भेटवार्ता गरेको बताए।
बीबीसीसंग कुरा गर्दै उनले भने, "ती दुवै बैठकमा हालै अन्तरिम संसदको विशेष अधिवेशनबाट पारित प्रस्तावहरु कार्यान्वयन गर्नुपर्ने र संविधानसभाको चुनावको नयाँ मिति तोक्नुपर्ने कुरामा मैलै जोड दिएको छु।"
विशेष अधिवेशनको बहुमतले संसदबाटै गणतन्त्रको घोषणा र पूर्ण समानुपातिक चुनाव प्रणालीका लागि आवश्यक कदम उठाउन सरकारलाइ निर्देशन दिएको थियो।
हाम्रा काठमाण्डूस्थित संवाददाता भन्छन्, चुनाव प्रणाली सम्बन्धी प्रस्ताव कार्यान्वयन गर्न सत्ताधारी गठबन्धनको एउटा प्रमुख साझेदार नेपाली कांग्रेस अझै तयार देखिएको छैन र सो दलको सहयोग विना संविधान संशोधनकालागि आवश्यक बहुमत पुग्न सक्दैन।
गतिरोध
हाल जारी राजनीतिक गतिरोध फुकाउने विषयमा सोमबार नै प्रधानमन्त्री कोइराला र माओवादी वरिष्ठ नेता प्रचण्डबीच छलफल भएको थियो।
नेकपा माओवादीका प्रवक्ता कृष्णबहादुर महराका अनुसार सोमबारको छलफल माओवादी प्रस्ताव कार्यान्वयन गराउनु पर्ने माओवादी अडानमा केन्द्रित भएको थियो।
“हाम्रोतर्फबाट संसदबाट पारित प्रस्ताव कार्यान्वयन गराउनु पर्ने माग राखियो, उहाँले सुन्नु भयो। तर त्यस विषयमा केही भन्नु भएन र कुनै ठोस सहमति निस्कन सकेन।”
हाम्रा संवाददाता भन्छन्, माओवादी अडानका कारण सिर्जित मानिएको राजनीतिक गतिरोधको अन्त्य गर्न माओवादी र अन्य प्रमुख दलका नेताहरुबीच परामर्श हुने क्रम भने जारी रहने देखिन्छ।
No comments:
Post a Comment